Weegskaal - N.P. van Wyk Louw (First edition)

Die gedagte het ontstaan dat daar nog heelwat verspreide stukke van N. P. van Wyk Louw is wat by wyse van voorwoorde of bydraes tot ander boeke gepubliseer is, maar tans versprei en meermale moeilik toeganklik is omdat die boeke soms uit druk is. Daarby was daar moontlik in die dokumentversameling in die Carnegie-biblioteek op Stellenbosch nog stukke wat nie tevore in boekvorm verskyn het nie.

Mev. Truida Louw het haar toestemming tot publikasie gegee op voorwaarde dat die finale keurwerk deur prof. J. du P. Scholtz gedoen word en verseker dat alleen stukke wat herdruk regverdig, opgeneem word. Die aanvanklike voorwoorde en ander opstelle is deur prof. J. C. Kannemeyer byeenbring, maar die finale keuse is deur prof. J. du P. Scholtz gedoen. Daar is besluit om die beskikbare stof in twee bundels te publiseer, een met artikels van meer letterkundige aard en die ander met artikels van meer algemene en sosiaal-politieke aard. Dr. Ian Raper het gehelp met die indeling en later met proefleswerk. Weegskaal is die bundel met literêre stukke. Die titel is deur prof. Ernst van Heerden gekies.