Twee vroue - Elsa Joubert (First edition)

Die lotgevalle van ’n vrou wat tot die uiterste beproef word, is reeds ontgin in drie meesterwerke deur Elsa Joubert: Poppie Nongena, Ons wag op die kaptein en Die Wahlerbrug. Die meevoerende novelles in Twee vroue sluit op boeiende wyse hierby aan.

In Pampas reis Elvira vroeg in die vorige eeu na Argentinië, waar sy in aanraking kom met vreemde mense en ’n vreemde landskap. Die ruimte van die vlakte wat haar alkante omring, die roerende glinstering van die skuinsgewaaide gras, vul haar oë, haar kop, haar hande, haar lyf … In afsondering, haar eensameheid versterk deur ’n liefdelose huwelik, word sy gekonfronteer met die grense in haarself, kom sy te staan voor die beperkinge van haar menslikheid en worstel sy met die onherroeplikheid van haar keuse.

In Klooster vertrek Helena saam met drie mans op ’n soektog na ’n verlore manuskrip. Maar tussen die bonkige mure van ’n massiewe vesting en teen die hange van ’n berg wat uitstyg bó die wye woestynlandskap, onderneem sy haar eie ontdekkingstog: ’n fisieke en spirituele reis, gevoer tot ’n evokatiewe hoogtepunt.

In Twee vroue word uiteenlopende verhale gekontrasteer. Maar dit is ook die verhaal van elke vrou oral, en uiteindelik ’n kroniek van die mens in konflik met die natuur.