Swart pelgrim - F.A. Venter

Swart Pelgrim word lank reeds erken as ’n Afrikaanse roman van gehalte. In die objektiewe, deernisvolle uitbeelding van Kolisile wat uit sy rustige geboortestreek na die grootstad gaan en daar ’n harde leerskool deurmaak, het F. A. Venter ’n hoogstaande prosawerk gelewer. Dit is ook ’n boek wat in al die jare sedert die eerste verskyning tot vandag niks aan aktualiteit ingeboet het nie.

Die louere wat Swart Pelgrim ingeoës het, hier en oorsee, het gekulmineer in die toekenning van die Hertzogprys vir Prosa aan die skrywer in 1961. Daarom het die uitgewer by geleentheid van die sesde druk — die eerste herdruk sedert die bekroning — besluit om Swart Pelgrim in ’n nuwe en spesiaal versorgde tipografiese gestalte aan te bied.