Suid van die wind: Die verhaal van drie eilande - Elsa Joubert

Suid van die suidwesmoeson waarmee die eerste seevaarders van die kus van Afrika na Indië oorgesteek het, lê die drie eilande Mauritius, Réunion en Madagaskar. Hulle is die bure aan ons ooskus met wie ons in vorige eeue in noue verband geleef het. Jan van Riebeeck het met hulle handel gedryf, en duisende Malgasslawe is na die Kaap gebring en het ’n bydrae tot die bevolking van ons land gelewer.

In Suid van die Wind vertel Elsa Joubert ons nie net van haar eie merkwaardige ondervindings op ’n reis deur dié eilande in die winter van 1961 nie, maar maak ons ook kennis met hulle veelbewoë geskiedenis, met die mense wat tans daar woon en met die rassevraagstukke wat ook hulle politiek oorheers. Hoe leef die rasse saam op hierdie drie slagvelde waar die Ooste, die Weste en ’n deel van Afrika mekaar ontmoet? Watter patroon is daar gevorm deur die lotswisseling van die geskiedenis? Hoe vergelyk dit met ons eie patroon? Waarom het Hollandse en Franse nedersettings van vorige eeue dáár misluk, terwyl dié aan die Kaap geslaag het? En in die lig van wat mens daar sien: wat sou ons roeping in Suid-Afrika wees? 

In een van die boeiendste en beste reisboeke wat nog ooit in Afrikaans verskyn het, vind die skryfster deur eie waarneming en gesprekke antwoorde op hierdie vrae, en laat sy die eilande in al hul eksotiese skoonheid en hul bevolkings in al hul bontheid voor ons lewe.