Somernagdroom - Marzanne Leroux

Al raak sy nie juis besonder opgewonde oor hom nie, is dit tog vir die sewentienjarige Gabrielle lekker dat sy en Cobus gekys is. Hulle verstaan mekaar en hulle hóórt bymekaar. Natuurlik gee dit ’n mens ook ’n sekere status. Cobus is darem hoofseun en glad nie onaansienlik nie.

Maar toe sy vir Henri leer ken, weet sy dat sy Cobus nooit regtig liefgehad het nie. Nie soos sy Henri met sy fluit en sy swart krulbaard liefhet nie. Al is hy net ’n bietjie langer as sy en al het hy ’n gebreklike voet, het sy oor niemand nog só gevoel nie.

Haar ma-hulle is wel bekommerd oor haar, want hulle dink Henri is te oud vir haar en te wêreldwys, maar háár bekommernis is Cobus. Wanneer moet sy wat vir hom vertel? Sy wil hom nie onnodig seermaak en sy hele eksamen befoeter nie. Toe sy uiteindelik die moed bymekaarskraap en hom vertel, is dit of daar ’n berg van haar skouers is. Nou kan sy haar ten volle oorgee aan haar liefde vir Henri sonder om skuldig te voel teenoor Cobus.

Maar in die somer kom daar soms skielike haelstorms wat alles stukkend slaan en kaal stroop. Gabrielle se wonderlike geluk sou kortstondig wees ...

Elke tienermeisie sal haar so in Gabrielle se opstandigheid en vrolikheid en hartseer en liefde kan inleef, dat Somernagdroom ’n haas onvergeetlike boek sal word.