Somerkos in Provence - Marita van der Vyver (First edition)

Hulle is 'n gewone gesin met kinders (wat sonder skroom gekoopte hamburgers en frites bo al hulle ouers se "gastronomïese hoogtes" sal kies) en 'n gewone inkomste. Hulle het nie die tyd, energie of geld om ingewikkelde, pretensieuse geregte met onbekostigbare bestanddele soos truffels of foie gras te maak nie, en hulle kinders stel nie belang in slakke, paddaboude en ander Franse spesialiteite wat elders moeilik verkrygbaar is nie.

Die resepte hierin is die kos wat hulle groot gesin en vriende kuier-kuier onder die plataanboom in hul tuin geniet. Dis lentekos, somerkos, Mediterreense en Provensaalse kos wat net so lekker sal smaak onder 'n jakaranda of kiepersol.

Van die beroemdste kosskrywers en kokke het hul kulinêre ontwaking aan Frankryk te danke. Ook die bekroonde skrywer Marita van der Vyver het in Provence by haar man Alain leer kos maak.

Somerkos in Provence is 'n heerlike mengsel van verbeelding en gesonde verstand, lekkerbekkigheid en praktiese oorwegings, en sal die minder én meer ervare kok begeester en besiel.