’n Emmertjie wyn - André P. Brink

“Nou, la’k jou vertel,” sê hy. “Bring die wyn.”

En hy wag dat ek eers ’n bottel op die okkasie breek. Nie heeltemal die beste wyn in my kaskeldertjie nie, maar darem. En bygesê: dis nie om Dail te kort te doen dat ek nie my beste uithaal nie, maar oor ’n waarskuwing wat hy my gegee het toe ek dit eenkeer wél wou doen. Toe was dit ook Augustusmaand soos dié keer. En hy keer my baie vinnig toe ek my hand aan die óú Roodeberg wil slaan:

“Weet jy dan nie,” vra hy, “dat mens nooit Augustusmaand ’n goeie wyn oopmaak nie? As die wingerd bot, dan huil die wyn in die bottel.”