Leipoldt 100 - ’n Bundel opstelle saamgestel deur Merwe Scholtz (First edition)

Die bydraes tot hierdie Leipoldt-feesbundel kom van geesdriftiges uit 'n vir die Afrikaanse literatuur seldsame groot aantal lesersgenerasies. Bewus of onbewus, en in mindere of meerdere mate, belig hulle die verskynsel wat deur die sg. "resepsie-teorie" by monde van Hans Robert Jauss soos volg geformuleer is: "The tradition of art presupposes a dialogue between the present and the past, according to which a past work cannot answer and speak to us until a present observer has posed the question which retrieves it from its retirement."

Die bundel is daarom nie alleen insiggewend vanweë die (soms verrassende) herinterpretasies en -waarderings wat dit van soms heel "bekende" Leipoldt-tekste verskaf nie, maar ook vanweë die beeld wat dit gee van ons literêre kritiek en geskiedskrywing. Dit het daarom iets van die bruikbaarheid van, sê maar, David Daiches se bekende Critical approaches to literature wat sedert die middel van die vyftigerjare gereeld herdruk word. Net, in Leipoldt 100 is die tekste meer eksplisiet byderhand as in Daiches se bloemlesing plus kommentaar.

Die twee bydraes wat nie in die eerste plek oor Leipoldt se literêre werk handel nie, dié uit die kombuis- en die koeranthoek, het dit albei ook met tekste te make. Die hedendaagse perspektiewe van die literatuurwetenskap maak dergelike studies veel meer relevant as wat literatuurwetenskaplike "puriste" van slegs enkele dekades gelede dit kon droom.