Lag byvoorbeeld - Pirow Bekker (First edition)

Al die soorte verhale wat Pirow Bekker al geskryf het, word in Lag byvoorbeeld verteenwoordig.

Daar is verhale soos dié in Die peerboom en ander verhale en Voordat berge gebore word: verhale wat ’n seunswêreld oproep. Die mannetjies pak uitdagings aan, met ’n “volwassene as simpatieke raadgewer of, meer dikwels, opponent. Een sukkel om ’n wildgeworde bokram net op die regte plek te kwes sodat hy ’n boerdery onder toesig van sy oupa kan begin; ’n ander moet 'n hondjie, sy verjaarsdaggeskenk, offer sodat die grootmense kan glo hy’s ’n gehoorsame kind. En nog een bepaal iets drasties wanneer die ouens hom oor sy onderbroek spot – die een wat sy huilerige ouma vir hom gemaak het.

Wanneer seuns man word, verander die uitdagings. Nou is die probleem: Hoe om nie meer ’n “simpel seep” te wees wanneer ’n “verre prinses” jou help met jou kleurblindheid of haar “fy teen jou laat gaan” op ’n bus of bed nie.

Oor die man in sy middeljare en ouderdom is hier ook verhale, verhale van die fel stryd tussen man en vrou, van verwerping, wraaksug en selfvernietiging – in die trant van die Vangs-verhale.

En die bundel sluit ook die Trap sag terwyl jy hardloop-soort in – kortkortverhale; allegorieë, satires, dié wat die verlossende lag opborrel.

Baie tekste in Lag byvoorbeeld is onmiddellik toeganklik en vermaklik; dit boei jou reeds met ’n eerste lees. Maar daar is ook tekste wat die stipleser beloon. So ’n leser kan die taalspel bewonder; en deur die “poëtiese” verdigting, ironieë en onderbeklemtonings dring om ’n dieper sin te ontdek.

Pirow Bekker skink hier van sy beste wyn.