Kikoejoe - Etienne van Heerden

Fabian Latsky, wêreldreisiger, herroep sy kindertyd op die vakansieplaas Soebatsfontein in die Karoo. Veral die somer van 1960, waarin baie somers saamvloei en dinge gebeur wat sy lewensuitkyk onherroeplik verander.

’n Uiteenlopende en eksentrieke groep personasies kom voor die oog staan:

• Fabian se ma wat terugverlang na haar gloriedae op die verhoog en lééf vir vakansiedae wanneer die rondawels by hul hotel gevul is met gaste.

• Sy pa wat eksperimenteel met LSD behandel word en geteister word deur hallusinasies.

• Sy ma se geheime minnaar, Heathcote MacKenzie, ’n oorlogsveteraan en permanente gas.

• Sy lesbiese tante, Geert, wat hom bewus maak van die groot wêreld buite die Karoo. (“Verlange, pupiltjie, verlange: dis die mens se enigste ware besit.”)

• En onder talle besoekers: die cowboy-sanger Charles Jacoby met sy lieflike hings.

Met sy een siende oog en sy liefde vir afluister, hou Fabian verwikkelinge fyn dop, en raak hy ingestel op onnoembare dinge wat onder die oppervlak roer. Hy is ook voortdurend bewus van die Dier wat in die donker rondsluip en sy kans afwag.

Dan word die mooi Sjonameisie Tsitsi wreed verkrag, en die vraag na wie die skuldige is, hang swaar in die lug.