Hoefslae: Helderitte in Suider-Afrika - C.J. Scheepers Strydom

’n Blouskimmel jaag deur die nag. Bedags skuil hy en sy ruiter in digte bosse, maar as die skemer kom, is dit weer opsaal en ry - en binne tien dae is Dick King in Grahamstad om hulp te ontbied vir die Engelse wat in natal deur die Boere vasgekeer wrod. Sonder die taai uithouvermoë van sy ryperd en die dier se byna menslike aanvoeling vir die erns van ’n situasie sou dié historiese rit moontlik nooit plaasgevind het nie.

En in die geskiedenis van Suid-Afrika gebeur dit telkens: die perd speel ’n beslissende rol.

Toe Jameson Transvaal stil-stil binneval, weet die Transvaalse regering dit vroeg reeds omdat ’n aflosspan-kommandoperde na Zeerust jaag van waar ’n telegram gestuur kan word - oor die enigste telegraaflyn tussen Wes-Transvaal en Pretoria wat nie geknip was nie. Van sulke voorvalle vertel dr. C.J.S. Strydom in Hoefslae.

Daar is die verhaal van ’n jong man wat ’n vasgekeerde Trekkerlaer red omdat hy sy perd vertrou; en die verhaal van Christiaan de Wet wat keep op keer vlak voor die neus van die vyand wegglip omdat Fleur, sy wit kommandoperd, hom nooit in die steek laat nie.

Tussen die hoefslae klink ook dié van perde wat nié redding kon bring nie: Dirkie Uys se perd; die kopsku perd van Louis Napoleon; en die perde wat maj. Allan Wilson en sy manne na hul heldedood gedra het.

Maar geleidelik raak die hoefslae stil, want die masjieneeu breek aan. Dr. Strydom is ’n geskiedkundige én ’n onderhoudende verteller - iemand wat die geskiedenis so kan aanbied dat dit met nuwe helderheid leef en die leser opnuut beetpak.