Dulle Griet - Riana Scheepers (First edition)

In die titelverhaal van Dulle Griet beleef ’n vrou die verskrikking van haar egskeiding.

Dolende in ’n vreemde stad, koop sy ’n poskaart-afdruk van Bruegel se “Dulle Griet” in ’n klein kunsmuseum. Dit gee iets van haarself weer:

Dulle Griet stap deur ’n landskap vol geweld en verwoesting. Om haar wriemel gedrogte lustig rond, is vroue besig om huise te plunder. Maar sy is paraat, dra ’n borsplaat van yster. Sy hou al haar aardse besittings saamegebondel in haar voorskoot. Verbete, dalk waansinnig, skry sy voort – na die hel.

Talle ander Griete verskyn in dié bundel.

Vroue wat geluk smaak, hoe “gesteel” en kortstondig ook al: in ’n berghuis op reënnagte; op ’n restaurantmiddag vol poësie en koestering. Of vroue wat hulle uitleef in “vrouesake”.

Maar meermale is hulle slagoffers van geweld. Uiterlike geweld soos politieke onluste, maar ook subtieler: wanneer ’n huwelik misluk, hulle benoud uitgebuit, verguis of verwerp word. Van die verhale toon hoe mans as seuns reeds gekondisioneer is vir dié geestelike skrikbewind.

Hier word ook vertel van die vroue se weerbaarheid, hoe hulle oorleef. Selfs met gebruik van die skadukant van seksualiteit.

Die verhale in Dulle Griet boei met hul variasies op temas, verrassende onderlinge verbande, hul kaleidoskopiese geskakeerdheid. Dis verhale wat gelaai is met kontras­te, relati­verings en ironie. ’n Ryk tweede bundel deur die reeds bekroonde Riana Scheepers.