Donker water - P.H. Nortje

Dit is ’n bekende gesig op Delwershoog – die motorwielkarretjie en sy bemanning: die sestienjarige Jak Joubert aan die leisels, die flink swart merrie Venus vooraan, en die komieklike mak aap Saartjie.

Delwershoop is Jak se kontrei. Nie ’n groot wêreld waarin groot dinge gebeur nie, maar Jak is tevrede en gelukkig, want sy wêreld is heel en veilig – dit het hy as vanselfsprekend aanvaar – vry van blaam.

Toe kom die nuwe seun, Dawid Hoffman. Om die een of ander rede is daar altyd iets tussen hulle wat toenadering onmoontlik maak. Op ’n dag kom die uitbarsting in die vorm van ’n wrede beskuldiging, wat diep seer maak omdat dit Jak se moeder en sy oorlede vader ook raak.

Jak se verbystering gaan oor in ’n grimmige vasberadenheid om te bewys dat daardie aanklag nie waar is nie. Maar na al die jare is die spore dof. Uiteindelik is dit duidelik dat die finale antwoord gesoek moet word in die kuil van die Swartivier waar Jak se vader sestien jaar gelede verdrink het – Donkerwater.

Hierdie mooi verhaal is onmiskenbaar die werk van die skrywer van Die Groen Ghoen en Pennie se Vuur, met sy eerbied vir die hegte en hartlike verhouding tussen mens en medemens – ’n eerbied wat deur humor en bruisend-gesonde lewenslus teen soetlikheid bewaar word.