Die stoetmeester - Etienne van Heerden (First edition)

“God sou nooit só ’n spesie bedink nie,” sê Seamus Butler van sy kantelbokke, die genetiese frats wat sy vader toevallig geteel het op die Setlaar-familieplaas.

Die bokke het ’n aangebore defek wat goud werd is: hulle slaan flou neer as hulle skrik. ’n Enkele kantelbok wei saam met ’n trop kleinvee en as ’n ongedierte toeslaan, word die bok prooi en die kudde ontkom.

Húlle, die weemoedige bokke met die spottende geel oog, géé die Butlers rykdom en invloed in die Oos-Kaap – dis belangrik in dié tyd van die groot politieke ommekeer. Want die oopbars van ’n oliebron reg in die middel van die hawestad Port Cecil dryf die swart civic-organisasie se aandrang op ’n verenigde stadsraad op die spits.

Aan die voorpunt van die swart aspirasies staan MaNdlovu Thandani, onvergeetbaar en groter as lewensgroot. Teenoor haar: Seamus Butler met sy donker, depressiewe buie wat in hom sleur soos die rivier wat in sewe delta-bene deur die stad in die see uitmond.

En rondom hulle, in twee wêrelde wat deur die geskiedenis op mekaar afgestuur word, is elkeen se familiekring wat dreig om mee te gee onder die druk van die tyd. Dis híér waar die verhaal van Die stoetmeester meesleurend deurloop, déúr die lewens van mense, elkeen betrokke by, elkeen uitgelewer aan die boeiende oerwêreld van die Oos-Kaap in ’n tyd waarin skoonheid en wreedheid, gewelddadigheid en hoop verstrengel raak.

Die stoetmeester is, ná die satiriese roman Casspirs en Camparis, veel meer verwant aan die sfeer van Toorberg, Etienne van Heerden se hoogs suksesvolle tweede roman. ’n Storie soos min, wat opstaan uit die weëige maar grootse landskap van die Kei.