Die sneeuslaper - Marlene van Niekerk (First edition)

Met stories vertel, kry ’n mens ’n duisend en een nagte om.

Maar hoe ontstaan stories, en waarom?

Die vertel van verhale het dikwels te doen met afhanklikheid – en met mag. Wie kies jy uit om jou storie voor te vertel? Watter moment kies jy en hoe bied jy dit aan? Wat presies wil jy jou leser aandoen, of spaar? En dan: Is ’n mens altyd vry om dit alles te bepaal?

Dít is ook die vrae wat die skeppende skrywer besig hou. Wat is die voorwaarde vir die skryf van fiksie? Nood, dwang, ’n luisteraar, ’n geleentheid, ’n retoriek.

In Die sneeuslaper word die betekenis van die vertelkun­s op magiese wyse deur vier verweefde verhale oor vriendskap vergestalt: ’n dosent kom haar moses teë in ’n buitengewone student; die aard van vriendskap ontvou by ’n grafrede; ’n stadsantropoloog misreken haar met ’n boemelaar; die vriendin van ’n fotograaf bely haar skuld aan die tragiese verloop van hulle verbintenis.

Hierdie eksentrieke karakters is almal alter ego’s saamgebind in ’n strange loop wat ook die leser intrek in sy kinkels. Hierin lê die aard van fiksie, die brood van die interpreteerder, die genot van die boekliefhebber.