Die nuwe Afrikaan: ’n Reis deur Angola - Elsa Joubert (First edition)

In September – Oktober 1973 besoek Elsa Joubert Angola, dié land wat so intiem verbind is met die lotgevalle van Suid-Afrika. Vir haar gaan dit in eerste instansie om ’n soeke na beter begrip, groter kennis van Afrika; dit gaan om die vraag na die tipiese verhouding tussen wit en swart en die rol wat elke ras en groep moet speel om die toekoms van hierdie vreemde kontinent waarvan Suid-Afrika en Angola onvervreembaar deel is, gesonde te laat ontplooi.

Want in hierdie kontinent word geskiedenis gemaak.

Sy reis per vliegtuig, per motor, per trein, per jeep. Sy besoek die noorde met sy dreigende, broeiende oerwoude waar die terroriste-gevaar skuil. Met die gevaarlike „koffiepad” besoek sy Quitexe, die dorpie waar die ergste moorde in 1961 plaasgevind het; sy besoek versteekte plase met hul hoë draadversperrings en sy reis deur die barre suide wat soveel nader, meer verwant aan Suid-Afrika is.

Sy gesels – met dokters, met onderwysers, met amptenare, militêre – sy vra uit, neem waar, maak haar eie gevolgtrekkings. En kom op soveel verskillende standpunte af: Daar word te min vir die ontwikkeling van die swartman gedoen... daar word te veel gedoen... wat gedoen word, is te laat.

Uit alles wat sy hoor, sien en ervaar, is dit duidelik dat dinge aan die gis is. Verandering moet kom.

En met wat in 1974 in Angola en Portugal gebeur het, is hierdie vermoede bevestig. Die hele bestel het verander.

Vir elkeen wat belang stel in die toekoms en die toestande in Afrika, is "Die Nuwe Afrikaan" ’n onontbeerlike boek. Hier word die agtergrond gegee waarteen Spinola se standpunt en die dramatiese gebeurtenisse waartoe dit aanleiding gegee het, sin sal maak. Elsa Joubert skryf met ’n liefde vir, ’n betrokkenheid by en ’n insig in toestande in Afrika wat aan hierdie werk ’n besondere trefkrag en outentisiteit gee.