Die laaste Sondag - Elsa Joubert (First edition)

Dominee Wessel Falk is predikant van ’n gemeente vlak by ’n swart gebied, nie ver van die grens nie. Tydens ’n besoek aan die grens voer hy ’n gesprek met ’n ontredderde jong man, wat ’n halfuur later in ’n landmynontploffing sterf. Die dominee beskou die jong man se woorde as ’n visioenêre boodskap, ’n goddelike openbaring. Mettertyd, ná ’n intense worsteling, aanvaar hy dit ook as ’n opdrag. Maar wanneer hy aan hierdie opdrag uitvoering begin gee, ontdek hy magte wat hy nie kan beheer nie. Die gebeure kry ’n eie momentum, stuur onkeerbaar af op ’n laaste, bloedige Sondag.

Die laaste Sondag is Elsa Joubert se eerste roman ná haar opspraakwekkende Die swerfjare van Poppie Nongena, wat aan haar internasionale roem besorg het. Dit is ’n spannende, gedurfde aktualiteitsroman wat ’n projeksie gee van die kerk in Suid-Afrika – ’n ommuurde kerk waarin dit in laaste instansie nie meer gaan om die versoeningsdood van Christus nie, maar om Ou-Testamentiese waardes: ’n oog vir ’n oog.