Die ander vennoot - P.J. Haasbroek (First edition)

“Om ons twee onder te kry, sal nie maklik wees nie. Ons is gewoond ons eie paaie loop. My oupa was ’n olifantjagter. En Herklaas s’n ’n Dorslandtrekker.”

Toe hy terugry, dink Pretorius hoe ver hy van Humpata af weg is. Hoe wyd lê die dorsland daardie kant toe. Gemsbokke verdwyn oor die rug van ’n duin, en kelkiewyne koers reguit en haastig sononder toe. Jy wéét hulle is op pad iewers heen, hulle weet goed hoe ver nog. Hoekom voel sy pad hiervandaan dan so onseker? Het hy verdwaal?

Herklaas Pretorius het by sy pa geleer dat ’n mens ’n goeie ding nie sommer los nie. Dís hoekom hy in sy vennootskap met John Heckrodt bly. Van hul begindae op Guntsas, John se beesplaas in die ou Suidwes, tot hul ametismyn en later Goraseb Safaris.

Die politieke omwenteling dwing hulle om na Suid-Afrika uit te wyk, onbewus daarvan dat dié land hom ook binnekort in ’n oorgangstyd sal bevind. John glo dat ’n moeilike tyd soos dié juis geleenthede vir entrepreneurskap bied en die vennote raak betrokke by die nuwe sakespel: swart ekonomiese bemagtiging. Maar daar is gevare wat Pretorius nie altyd in berekening bring nie. Gelukkig is daar ook die mooi Marita met wie sy lewe vervleg geraak het.