Die Afrikaanse literatuur 1652 - 1987 - J.C. Kannemeyer

Die eerste volledige Afrikaanse letterkundegeskiedenis in een band vir sowel die algemene as die universiteits- en onderwyskollegemark sedert die publikasie van Rob Antonissen se werk in die vyftigerjare. Vir Die Afrikaanse Literatuur 1652–1987 het dr. Kannemeyer nie alleen sy omvattende tweedelige letterkundegeskiedenis grondig hersien nie (o.m. deur die weglating van dele wat slegs vir vakkundiges van belang is), maar ook nuwe publikasies van outeurs van vóór 1970 – soos Elisabeth Eybers, Ernst van Heerden, Breyten Breytenbach, Wilma Stockenström en Antjie Krog – uitvoerig bewerk. Lesers wat dr. Kannemeyer se tweedelige letterkundegeskiedenis ken, sal veral geïnteresseerd wees in die oorsig oor die jongste letteratuur (1970–1987) wat oor vyf hoofstukke strek – die eerste keer dat die hedendaagse skrywers in Afrikaans só uitgebreid en volledig behandel word. Veelvuldige foto’s van skrywers, hulle handskrifte en ander illustrasies dra daartoe by om die chronologiese verloop vir die leser aanskoulik te maak. Die boek sal ongetwyfeld dié standaardwerk in een band oor die hele terrein van die Afrikaanse letterkunde wees.