Die laaste jagtog - Dot Serfontein (First edition)

In hierdie bundel kortverhale bring die skryfster deur haar karakters die humor en deernis wat in die alledaagse skuil, na vore. In die titelverhaal maak ons kennis met Kosie, boer maar ook argelose wilddief, en sy mooi vrou, Jeanne (“uit die sagte wêreld”), wat daarna smag dat hy tot ruste moet kom. Die verhaal beskryf ’n rampspoedige laaste jagtog teen die agtergrond van aanpassingsprobleme binne die huwelik, asook in nuwe politieke omstandighede.

Ons voel hartseer én glimlag oor Diederik Venter wat so onbesorg met sy sonderlinge stokperdjie aanploeter. Saam met ou Drien, die kleremaakster, wat in haar middeljare ’n “regte” huweliksaansoek kry, voel ons bly én terneergedruk. Ouma van Wyk se kinderlike verlange na haar kinders is roerend en nog meer so wanneer ons uitvind dat sy eintlik baie meer verstaan as wat hulle (en ons) dink. Ons skater van die lag vir die “Antie” wat ’n “sirpraais” in die vorm van ’n byekorf “tjok en blok” vol bye kry – en dan só graag met die bye wil vriende maak. In die proses beleef sy allerhande, soms taamlik pynlike, avonture.

Dot Serfontein het reeds groot gewildheid verwerf met haar vorige werke, en in Die laaste jagtog vind ’n mens dieselfde sprankelende prosa wat die karakters in haar bundels sketse, "Systap onder die juk", "Ek is maar een" en "Amper my mense" vir die leser laat lewe het. Die laaste jagtog is suiwer leesgenot.