Vygies en ander vreugdes - Maretha Maartens

Dit sal ontverantwoordelik wees om hierdie boek in manlike hande te laat beland. Die man het genoeg probleme met sy tjekboek, sy cholesterol, sy huislening, sy politiek en sy besige program.

’n Man wil nie lees dat die huisvrou hom soms in aantreklikheid oortref, dat vroulief sy fases ken en dat sy kinders soms in die rooilampiebuurt partytjie hou nie. Miskien ontstel vroulief se stroopsoet vakansiedrome, waarvan daar in hierdie boek vertel word en die kyk wat sy in haar oë kry nadat sy van Pienkvoet gelees het, hom net verder.

Enige man sal hierdie boek wil verban, of miskien moet hy liewers nie. Gestel die vrou wat hierdie boek lees, word ’n vygie. Gestel sy word ’n stralende vygiebos in ’n bleek landskap. Sal dit nie ’n verrassing vir manlief wees nie?