Die groot anders-maak - Jan Rabie

Toe die eerste trekboere die berge tussen die Boland en die Karoo oor is op soek na nuwe weiding vir hul aangroeiende veetroppe, het die doodsklok begin lui vir die Khoi-Khoin wat so lank die heersers oor die uitgestrekte vlaktes was.

Aan die hand van die lotgevalle van die vrou Keas, wat die witmense se lewenswyse leer ken en aanvaar het, maar dan na haar volk probeer terugkeer en ontdek dat hulle tot ondergang gedoem is, teken Jan Rabie in Die Groot Anders-Maak die sedelike en fisiese verval van ’n trotse ras en eiesoortige lewensvorm wat nie kon staande bly teen die vloede van die nuwe intrekkers nie.